Քարահունջ հայագիտական կենտրոնի տարեդարձն է

Այսօր մենք տոնում ենք <<Քարահունջ Հայագիտական կենտրոն>> ՀԿ-ի տարեդարձը։

Հայագիտական կենտրոնի պաշտոնական գրանցումից դեռևս 2 տարի առաջ նույն թիմով նախաձեռնել էինք «Փրկենք Քարահունջը» շարժումը, այսինքն՝ ընդհանուր առմամբ կենտրոնն արդեն 8 տարեկան է, իսկ պաշտոնական գրանցումից անցել է 6 տարի։

Սակայն ամենակարևորն այն է, որ մենք շարունակում ենք գործել և անում ենք հնարավոր ամեն ինչ Քարահունջի պահպանության և ուսումնասիրության ուղղությամբ։

Սիրելի թիմակիցներ, ընկերներ և հետևորդներ՝ սրտանց շնորհավորում ենք ձեզ «Քարահունջ Հայագիտական կենտրոնի» ծննդյան առթիվ։ Այս համեմատաբար կարճ ժամանակահատվածում մեզ հաջողվել է բազմիցս կանխել Քարահունջին սպառնացող հնարավոր վտանգները և հնարավորինս պահպանել այս բացառիկ հնավայրը։

Բացի այդ, համագործակցել ենք բազմաթիվ մասնագետների հետ, կազմակերպել գիտարշավներ դեպի Հայաստանի հնավայրեր, իրականացրել միջոցառումներ, հանդիպումներ և դասախոսություններ՝ նպաստելով հայագիտության զարգացմանն ու ոլորտի աշխուժացմանը։

Կենտրոնի գործունեության շնորհիվ բազմաթիվ հայագետներ և ոլորտի մասնագետներ կարողացել են հաստատել մասնագիտական համագործակցություններ, ստեղծել նոր կապեր և համատեղ նախաձեռնություններ, որոնք էլ ավելի են խթանել հայագիտության առաջընթացը։

Արտերկրում ապրող բազմաթիվ հայ և օտարազգի անհատներ հնարավորություն են ստացել լսվելու, Հայաստան այցելելու ընթացքում բացահայտումներ անելու և ավելի խորությամբ ճանաչելու մեր պատմությունն ու գիտական ժառանգությունը։ Բազմիցս մեր կազմակերպությունը միջնորդի դեր է ստանձնել գիտնականների միջև՝ նպաստելով համագործակցությունների ձևավորմանը և ամրապնդմանը։

Մեզ դեռ երկար և պատասխանատու ճանապարհ է սպասում։ Առջևում նոր ծրագրեր, հետազոտություններ, քննարկումներ և համագործակցություններ են՝ լի կարևոր և հետաքրքիր բացահայտումներով։

Քարահունջ աստղադիտարանը այն եզակի հնավայրերից է, որը ոչ միայն վկայում է հազարամյակներ առաջ ապրած մարդու բարձր զարգացվածության մասին, այլև օգնում է վերարժևորել մեր պատմությունը ժամանակի խորքերից։ Եվ մենք հպարտ ենք հայտարարելու, որ կանենք ամեն հնարավորը և անգամ անհնարինը՝ Քարահունջը պահպանելու համար, քանզի այն մեր բոլորի ընդհանուր ժառանգությունն ու հարստությունն է։

Շնորհակալ ենք այս տարիների ընթացքում մեզ աջակցած բոլոր գործընկերներին, բարեկամներին և անհատներին։

Շնորհավոր տարեդարձդ, Քարահունջ Հայագիտական կենտրոն։